رامي العاشق وفادي جومر
فادي:
كل الحكي اللي ما انحكى قالوه..
بين الأصابع .. بكي
بـ شيبهن إيام عم تنعد.. بالغصّة
واللي خلَق .. عبّى المدى صريخو
والخلِق.. ما سمعوه
كل الحكي اللي ما انحكى.. قالوه.
فتحوا بوابن للهوا.. بأيّار
ولما وصل كانون بالتلج .. وهدر
ما تذكروا ولا باب
تـ يردّوه
أمواتهن ع الأرصفة
ضاقت مقابر بالهن.. ما عاد فيها مطرح لإسم الـ قِتل
صحاب القتيل تجمّعوا
ما في عزا
ولا في جنازة ونادبة ولا في دمع
حنّوا على رفيقن
صبّوا عرق.. تـ يشربوا
ويسقوه
كل الحكي اللي ما انحكى: قالوه.
رامي:
كلّ الحكي اللي ما انحكى ..
قالوهْ ..
وجهَكْ مطرْ نشفانْ ..
صوتَكْ خِلِق عطشانْ ..
مَدّوا القصايِد حدْ جسمَك خايفِةْ
وجِسمَكْ رجَفْ ..
عشقانْ ..
كلّ الحكي اللي ما انحكى..
مكتوب عالـ بُكرا ..
كلّ الحكي اللي انقالْ:
بكتابَك السَّكْرةْ
ويلَكْ إذا بتقْرا ..
نسيوا يقولوا عن ولدْ حافيْ ..
هاجمْ على ضهرَك وحِشْ
محمول ع كتافيْ
نسيوا يقولوا مات
أَكَل الحكي أوقاتْ
ونَطَق بقصيدِةْ رَجْعتو ..
يا أرض مَ تخافيْ
كلّ الحكي اللي ما انحكى ..
نحنا ..
وشموع عم تفتَحْ كِتِبْ لليل تا يسألْ..
شو رجَّع الأوّلْ؟ ..
شو صار تا كمَّلْ؟ ..
بِعلمي مضى ونسيوهْ ..
كلّ الحكي اللي مَا انحكى قالوه..
فادي:
كل الحكي اللي ما انحكى قالوه..
تفرّج على صبر النزف ع الروح تـ تطلع
تفرّج على ملح الرمل
عم ياخد البكوة .. بحر
وبالموج عم يرجع
تفرج على وجه الأهل
يالـ كنت تحسبهن أهل
كيف العمى مخيّم على قلوبن
وما ضل فيها نبض.. تـ تسمع..
كل الحكي
فيهن
بناب أزرق تحت ضحكاتن
بالسم
سرسب من أغانيهن
كل الحكي اللي ما انحكى: قتلوه.
رامي:
قتلوه ..
لمّا وشوشوا الماضيْ فرَحْ سِرَّكْ ..
شدّوه من زند الخطِفْ
مخنوقْ .. مَ يغرَّكْ
وجهو غضَبْ..
قلبو تَعَبْ ..
جرّوه .. تَـ يجرَّكْ
ومن بين كل الـ سَرّبوا عَدّوْهْ ..
وإسمَكْ إنِتْ سمّوهْ ..
كلّ الحكي اللي ما انحكى ..
ردّوكْ لُو ..
وعَ مرايْتَكْ .. ردّوْه
فادي:
كل الحكي.. قبل الحكي: خبّوه
بمزراب عم يسرق مطر مـ الغيم
ع سطوح واقف ما بقيلو بيت
بنصّ الحكي.. يمكن
وكمالتو: يا ريت
باسمك نكر نجمك
وإنت تنادي للسما
وإنت اللي فوق بعيد
وإنت اللي ما ردّيت
كل الحكي: ورقة وحبر
ورشقة قهر
خربشتن.. وشقّيت
كل الحكي:
قنديل
من آخ طول الليل.. عملوا فتيل
من دم ناشف ع الأرض
عبّوه زيت
بوجه العتم: طفّوه..
رامي:
مكسور يا ربّ الشِّعِر ع وراقْنا..
مفقود يا ضوّ الـ بقي برفاقْنا ..
كلّ الحكي المكتوبْ..
متل الصبر مسكوبْ ..
عا سقفْ من بكوِةْ..
يا ليلْ .. يا شتوِةْ ..
عم نشربَكْ مَيّ ودمع ونغصّْ..
يا قبر حاجْ تعصّْ ..
متل العرَق ع عناقنا ..
لا عربَش ولا داقنا..
والرمل مالو عيوبْ ..
كلّ الحكي يا صاحبي متحضّر ومكتوبْ
فادي:
كل الحكي.. اللي ما انحكى.. مكشوف..
مخربط على هامش ورق
بين الملامح زغللت بعيون كحلتها عرق
بتياب طفل اللي انولد من عرس
فيه الأغاني .. باردة
وفيه الأسامي.. زايدة
لا شاف كاس ولا شبق
كيف الحجر بيشوف؟
كل الحكي
كل الحكي يللي انحكى..
مخطوف..
رامي:
ولِك أوفْ!
عم ناكُل مدانا ونبلع اللهفِة..
والرّوح مشروب العرسْ ..
شفّة ورا شفِّةْ..
كنّي حجر منحوت عالخوف وجِفِلْ
كنّو العشق .. قطفِةْ ..
يلّي كانوا حكايتَك.. كِمْلوا ..
ويلّي كانوا بْدايتَكْ .. مَلّوا ..
ويلّي شدّوا عالقلبْ
شْريط الصور شحّارْ..
حكيوا على مَشْحِة سوادَكْ ع الملا … وفلّوا ..
حكيوا الحكي الـ مَ بينحكى
حطّوكْ بالماضي ..
كل الحكي الـ مَ بينحكى ..
فاضي!
فادي:
كل الحكي اللي ما انحكى.. مسموع
هادر بصوت الـ آخ تحت الأرض
شاقق سما طرشا
بغصة ولد
عم ينطر السكين تـ تخلص
مشوراها ع عنق خيّ صغير
ومن غصّتو.. يغشى
كل الحكي.. اللي ما نحكى.. نبضة قلب
وكل الحكي.. يللي انحكى.. إنشا..
رامي:
خايف إذا قلنا الحكي كلّو ..
يخجل حنين تيابنا ونعرى..
كلّ آخ، كلّ سكّين مسنونة ونبي..
كلّ حبّ، كل بنت وصبي ..
كلّ الحَبي..
كلّ أرض قلتلّا: اطلبي
كل كركبة ..
كل رجفة بـِ حضن الندم..
ربّاها عالفرقة وربي..
كلّ المشّي برجوع..
كلّ عنِّة بالموجوع..
كلّ حضن كل رَمشِةْ ..
كلّ (كلّ)..
كلّ (كلّ شي)..
لفُّن ع بعضُن واحتفل بالنّار..
وصرِّخْ متل ختيارْ
مكسورْ متلك صارْ
عربِش بروحو ولفّ ع حدود العضمّ شدّو ..
وكلّ الـ بنيتو بحضنها .. هدّو ..
شحّار مع شحّار…
ما بيفتحوا ضوّ المضى عالـ صار..
كلّ الحكي الـ عم ينحكى .. ما صار
فادي:
سمعت الحكي بين الحطب والنار؟
بين الوتد، والحبل، والخيمة .. وقلب نازح؟
سمعت الحكي
يالـ قالتو رصاصة
لصدر الصبية الـ راجعة من صرختا.. ” أحرار “
سمعت الوجع
فوق البدن
بيقول : لا تصالح؟
سمعت العتب
مبحوح من حلق الأرض
مجروح من غدر النبض
رايح مع الـ جاي
وجاي مع الـ رايح؟
سمعت الحكي اللي انقال ع الساكت؟
بخصلة على جبين الطفل.. شابت؟
يا مرندح الكلمات ع المبسم
كل الحكايا الـ ما انحكت
قتلت صحابا… وفوقهن: ماتت..
رامي:
وصل الحكي..
لِبعيد جابو راكض وشمتانْ..
واللاجئ اللي قال: خيمتنا الأخيرَةْ .. كانْ
شايل بإيدو نَعْوتو وصورةْ..
وقّلا اكتبي سورةْ:
قبلِك عشِتْ هربانْ
بعدِكْ عشتْ هربانْ
فيكي عِشِتْ يمكنْ..
يمكن كنت غلطانْ..
وصل الحكي كلّو ..
وخلص الحكي كلّو ..
ما عاش مِن خان البلد يا خيمتي الحرّة..
قلنا الحكي مرّة..
قنديل قصّتنا احترقْ والنار أكلتنا..
وريحة حضنّ ما فارق الرجفِةْ وغفي..
عالبعد ملّتنا
يا ريت ما مِتنا..
خلص الحكي..
كل الحكي ..
اللي انقال.. والـ ما انقال..
والـ كان عَ مواج البحر مرمي متل خرقة..
كلّ الحكي رفقة ..
وما ضلّ في شي ينحكى قدّام هالـ غرقوا ومعُن ما ضلّ في ملقى..
خلص الحكي..
سكّر على جرح القصيدة حكايتَك
وافتاح للغفوة حلمْ
واتروك للقصّة البكي..
للي قروا .. والـ ما قروا..
والـ قالوا كذّاب وذكي..
خلص الحكي..
خلص الحكي!
16-8-2015
03:30 فجرًا
مجلة مستقلة، تعنى بشؤون الثورة السورية، نصف شهرية، تطبع وتوزع داخل سوريا وفي عدد من مخيمات اللجوء والتجمعات السورية في الخارج
