غرفتي

مفتوح شباك الوقت

وجه الصبح

وع مهل عمّ ينسّم النسيان

كِتف الصبر مكشوف..

عم يرتعش.. بردان

ووجوه

متل الـ كّأنا نجوم..

رح تحرقا شمس الغياب الطالعة

ع بيت حيطانو وجع

وسقفو تعب.. عتبان..

**

مين الـ حملنا ع مراكب والبحر صحرا؟

مين قتلنا بالملح.. غامر عسل بكرا؟

مين اللي خلانا نعادي حلمنا

نمحي أسامينا من قلوب بنحبا

مين الـ عملنا ناس من نسيان؟

**

كل ما الوقت قرّب على بالي

بحركش دفاتر من ورق ضحكات

شو مغيّرة

شو مكدّرة

وشو ناسية.. وشو قاسية..

وخطي

كيف معترة..

ضحكات ما عمرا انطفت

ع البعد صارت مقبرة

حتى الضحك بيموت .. ع الهجران..

**

بعدك ببالي بلاد ناطر تنكسر فيها الحدود

بعدك ببالي بلاد.. ارجعلا

لملم ملامحها

من حفة السكين

من غبرة البارود

بعدك ببالي يا بنت

أخدت معا بسفرتا .. صوتي

والبال والموال

والتين والعنقود..

بعدك ببالي متل أول آخ

من لسعة الكرباج ع حلمي

تاري غيابك علّم الجلاد

وحضورك الباقي : أنا المجلود

اسمك خناجر غارقة بقلبي

وعم تكبري

وتكبر خناجر غيبتك حتى تصير رماح..

تاريك انت الحبس.. والسجّان

**

رديت شباك الوقت

قوّت نار الوهم

بركي بتدفا غرفتي..

وطلعت من بردك ع جهنم الشارع

متل الطفل… هربان.