عم تنطره

عم تنطره.. تـ يروح
ياخد معو الـ بقيان من أيام
من الولدنة
من الغنج عا كتفو
عم تنطره تـ يروح
تلملم أصابيعو
من كتافها، من شفافها
تحطّن بمنقل وقت
بيدفّوا…
عم تنطره.. تـ يروح
يمشي متل كلّ الـ إجوا.. وراحوا
يطلع من البال الشقي
يسافر .. بعد أبعد
يسكّر شبابيك الوهم
يالـ كان فاتحها
تـ يقول بكرا بنلتقي
يوسّع مطارح للعمر
للغيم يمرق عا تراب الروح
يالـ نشف من شمسو
لا شاف بعل.. ولا سَقي
عم تنطره تـ يروح
تا ترتاح
تبلّش عمر عم ينسرق بـ نطرتو
تضّوي الصبح
تبدا نهار جديد
وتخلص بقا.. من سهرتو
عم تنطره تـ يروح
ياخد معو كل الأغاني العالقة بـ بالها
كل اللي داخو بفيقتو
وكل اللي صحيو بسكرتو
.
عم تنطره تـ يروح
تعبت من الرجعة معو
تعبت من سكوتو اللي ما خلا حكي
وتعبت وهيّي تسمعو
عم تنطره.. تـ يروح
وكل ما مشي خطوة
بتمد إيديها على دربو
وبتشد
حتى ترجّعو..

فادي جومر

شاعر وكاتب سوري، من مواليد ١٩٧٩. ينشر في العديد من الصحف والمواقع العربية. له عدة مخطوطات شعرية لم تنشر بعد. كتب الكثير من أغاني الثورة السورية التي تنتاوب على غنائها مجموعة من الفنانين السوريين والعرب كمنعم عدوان،خاطر ضوا، وائل نور، حارث مهيدي، هيمى اليوسفي، وغيرهم. يعيش في ألمانيا منذ ٢٠١٥ وكتب النسخة العربية من نشيد الفرح لبيتهوفن، كما غنت فرق ألمانية من كلماته بالعربية.